ਸੂਬਾ ਸਰਕਾਰ ਤੈਅ ਕਰੇ ਦੀਵਾਲੀ ਤੇ ਪਟਾਕੇ ਚਲਾਉਣ ਦਾ ਸਮਾਂ:ਸੁਪਰੀਮ ਕੋਰਟ

ਨਵੀਂ ਦਿੱਲੀ – ਸੁਪਰੀਮ ਕੋਰਟ ਨੇ ਦੀਵਾਲੀ ਤੇ ਪਟਾਕੇ ਚਲਾਉਣ ਨੂੰ ਲੈ ਕੇ ਜਾਰੀ ਆਦੇਸ਼ ਤੇ ਸੋਧ ਕੀਤਾ ਹੈ| ਸੁਪਰੀਮ ਕੋਰਟ ਨੇ ਕਿਹਾ ਕਿ 2 ਘੰਟੇ ਦਾ ਸਮਾਂ ਸੂਬਾ ਸਰਕਾਰ ਤੈਅ ਕਰੇਗੀ| ਉਨ੍ਹਾਂ ਕਿਹਾ ਕਿ ਸੂਬਾ ਸਰਕਾਰ ਦੱਸੇ ਕਿ ਪਟਾਕੇ ਕਦੋਂ ਚੱਲਣਗੇ| ਕੋਰਟ ਨੇ ਇਸ ਤੋਂ ਪਹਿਲਾਂ ਦੀਵਾਲੀ ਤੇ ਸਿਰਫ ਰਾਤ 8 ਵਜੇ ਤੋਂ 10 ਵਜੇ ਤਕ ਪਟਾਕੇ ਚਲਾਉਣ ਦੇ ਆਦੇਸ਼ ਦਿੱਤੇ ਸਨ| ਸੁਪਰੀਮ ਕੋਰਟ ਨੇ ਕਿਹਾ ਕਿ ਗ੍ਰੀਨ ਪਟਾਕਿਆਂ ਦਾ ਆਦੇਸ਼ ਸਿਰਫ ਦਿੱਲੀ -ਐਨ.ਸੀ.ਆਰ. ਲਈ ਹੈ| ਬਾਕੀ ਦੇਸ਼ ਵਿੱਚ ਆਮ ਪਟਾਕੇ ਚਲਾਏ ਜਾ ਸਕਦੇ ਹਨ| ਬੈਂਚ ਨੇ ਕਿਹਾ ਕਿ ਦੀਵਾਲੀ ਤੇ ਪਟਾਕੇ ਚਲਾਉਣ ਤੇ ਰੋਕ ਨਹੀਂ ਹੈ ਪਰ ਵਧਦੇ ਪ੍ਰਦੁਸ਼ਣ ਕਾਰਨ ਪਟਾਕੇ ਚਲਾਉਣ ਦਾ ਟਾਈਮ ਜ਼ਰੂਰ ਨਿਰਾਧਾਰਿਤ ਕਰ ਦਿੱਤਾ ਹੈ| ਜਿਕਰਯੋਗ ਹੈ ਕਿ ਤਾਮਿਲਨਾਡੂ ਸਰਕਾਰ ਨੇ ਸੁਪਰੀਮ ਕੋਰਟ ਨੂੰ ਅਪੀਲ ਕੀਤੀ ਸੀ ਕਿ ਦੀਵਾਲੀ ਦੇ ਦਿਨ ਸੂਬੇ ਦੀ ਧਾਰਮਿਕ ਪਰੰਪਰਾ ਮੁਤਾਬਕ ਸਵੇਰ ਦੇ ਸਮੇਂ ਵੀ ਪਟਾਕੇ ਚਲਾਉਣ ਦੀ ਇਜਾਜ਼ਤ ਦਿੱਤੀ ਜਾਵੇ| ਪਟੀਸ਼ਨ ਵਿੱਚ ਕਿਹਾ ਗਿਆ ਕਿ ਦੀਵਾਲੀ ਦੇ ਤਿਉਹਾਰ ਨੂੰ ਲੈ ਕੇ ਹਰ ਸੂਬੇ ਦੀ ਆਪਣੀ ਵੱਖ-ਵੱਖ ਪਰੰਪਰਾ ਤੇ ਸੱਭਿਆਚਾਰ ਹੈ| ਅਜਿਹੇ ਵਿੱਚ ਸੁਪਰੀਮ ਕੋਰਟ ਦੀ ਪਾਬੰਦੀ ਲੋਕਾਂ ਦੇ ਧਾਰਮਿਕ ਅਧਿਕਾਰਾਂ ਨੂੰ ਖਾਰਿਜ ਕਰਦਾ ਹੈ| ਇਸ ਤੇ ਕੋਰਟ ਨੇ ਕਿਹਾ ਕਿ ਜੇਕਰ ਸਵੇਰੇ-ਸ਼ਾਮ ਦੋਵੇਂ ਸਮੇਂ ਪਟਾਕੇ ਚਲਾਉਣ ਦੀ ਰਿਵਾਇਤ ਹੈ ਤਾਂ ਦੋਵੇਂ ਸਮੇਂ 1-1 ਘੰਟਾ ਦਿੱਤਾ ਜਾ ਸਕਦਾ ਹੈ|